Licenciada e Doutora en Xeografía e Historia na Universidade de Santiago de Compostela (USC), nos dous casos con Premio Extraordinario, é Catedrática de Historia Moderna.

Foi directora de estudos na École des Hautes Études en Sciencies Sociales de París en dous períodos (2004, 2012).

Vogal do Boureau de la Commission Internationale de Dèmographie Historique e vicepresidenta da Fundación Española de Historia Moderna (2006-2008).

Xestora de Historia da Subdirección Xeral de Proxectos de Investigación do Ministerio de Economía e Competitividade.

Pertence tamén á Comisión de Artes e Humanidades da Axencia Nacional de Avaliación da Calidade e Acreditación e ao Patronato do Archivo General de Simancas.

Dirixiu o Grupo de Investigación 1921 (Historia Moderna) da USC. Nesta universidade é membro na actualidade do consello científico do Centro de Estudos Europeos, coordinadora do Doutoramento de Historia, Arte e Xeografía, e vogal da Escola Internacional de Doutoramento.

Forma parte dos consellos científicos de 25 revistas especializadas, españolas e de México e Francia, e de comités editoriais do CSIC e de varias universidades, ademais de ter dirixido a revista Obradoiro de Historia Moderna.
Investigadora principal en 22 proxectos, e autora de 11 libros, 77 artigos científicos e 196 capítulos de libro
 

Doutora en Farmacia (Cum Laude), licenciada en Química (Premio Extraordinario) pola Universidade de Santiago de Compostela, e Diplomada en Edafoloxía pola Universidade de Nancy (Francia).

Investigadora do Consello Superior de Investigacións Científicas dende 1965 e membro da súa Xunta de Goberno (1980-1984), é profesora de Investigación vinculada “Ad Honorem” ao CSIC.

Foi Investigadora Asociada ao Centre National de la Recherche Scientifique (CNRS) de Francia.
Académica Numeraria da Academia de Farmacia de Galicia e presidenta do Consello Asesor de Investigación e Desenvolvemento Tecnolóxico de Galicia.

Dirixiu o Instituto de Investigacións Agrobiolóxicas de Galicia (1994-2004) e foi a primeira muller en ocupar o posto de First Vice-Chairmen of Commission II: Soil Chemistry, da International Society of Soil Science (1986-1990).

Recibiu numerosas distincións e premios, entre eles o Premio de Investigación “Fray Bernardino de Sahagún” (1972), o Premio Galicia de Investigación da USC (1982) e a Medalla Castelao (2009). É Socia de Honra da Sociedad Española de la Ciencia del Suelo (SECS), Medalla de Prata CSIC 50 anos (2011) e Premio á Excelencia Química 2012.

Creou o Grupo de Excelencia de Bioquímica do Solo, dirixiu numerosos proxectos de investigación e é autora de máis de 200 publicacións.
 

Licenciada en Matemáticas pola Universidade de Santiago de Compostela (USC), obtivo o doutoramento en Ciencias Matemáticas pola Universidade Autónoma de Madrid e pola Universidade de París VI.

É catedrática do Departamento de Matemática Aplicada da Universidade de Santiago (2000), do que foi directora entre 2004 e 2008 e coordinadora dos programas de doutoramente durante máis dunha década, chegando a acadar a mención de calidade da ANECA.

Foi coordinadora do Nodo CESGA do Proxecto Ingenio Mathematica (i-MATH, 2006-2012), membro do Consello de Dirección do proxecto e da súa Plataforma Consulting.

Impulsora da Rede Española Matemática-Industria (math-in, 2011), da que é presidenta fundadora. Tamén participou na fundación do European Service Network of Mathematics for Industry and Innovation (EU-MATHSIN, 2013), e é membro do seu Consello de Dirección.

Dirixe, dende a súa fundación, o Instituto Tecnolóxico de Matemática Industrial (ITMATI, 2013).

É membro do Applied Mathematics Committee da EuropeanMathematical Society. Tamén é membro do ECCSM (Computational, Solid and Structural Mechanics) da European Community on Computational Methods in Applied Sciences (ECCOMAS).

Participou en máis de 50 proxectos competitivos de investigación, sendo investigadora principal en 34 deles, e publicou arredor de 80 traballos na súa área. Leva dirixidas 8 teses de doutoramento.

Licenciada en Física pola Universidade de Santiago de Compostela (USC), coa especialidade de Astrofísica pola Universidade de La Laguna (Tenerife).

Doutora en Astrofísica (1990) pola Universidade de Manchester (departamento de Radioastronomía de Jodrell Bank), completou a súa carreira posdoutoral no departamento de Física da Universidade de Cardiff.

Marchou a Canadá, onde traballou en distintas empresas aeroespaciais, implicada en proxectos de satélites de rescate (SARSAT), e outras misións de satélites (Mars Hyperspectral Mission, Polar Communications and Weather Mission, Hyperspectral and Luminesense, etc.).

En 2006 incorporouse ao proxecto do Telescopio Espacial James Webb (JWST) da NASA, contratada pola Axencia Espacial Canadiense (CSA).

En 2013 comezou a traballar directamente para a NASA, sendo Enxeñeira Principal de Sistemas no Centro Espacial Goddard, encargada de dous dos instrumentos do Telescopio Espacial James Webb.

Foi a encargada da proba fría final de todos os instrumentos do telescopio JWST.

Polo seu traballo na Axencia Espacial estadounidense, foi merecedora de múltiples recoñecementos e premios, entre eles a medalla da NASA para o Logro Público Excepcional (Exceptional Public Achievement Medal) en 2016.

Doutora en Bioloxía e licenciada en Farmacia pola Universidade de Santiago de Compostela (USC). Desenvolveu parte da súa formación postdoutoral nas universidades de Maryland e Oregón.

É catedrática do Departamento de Microbioloxía e Parasitoloxía da USC, que dirixiu entre 2004 e 2013, e coordinadora do Programa de doutoramento en avances en bioloxía microbiana e parasitaria.

Dende 1984, codirixe o grupo de investigación en Patoloxía de Animais Acuáticos, Grupo de Referencia Competitiva da Xunta de Galicia.

É inventora de 8 patentes de uso en acuicultura, relacionadas con vacinas e procedementos diagnósticos para enfermidades en peixes de consumo habitual.

Participou en arredor de 90 proxectos de investigación neste eido, impulsados tanto por entidades públicas como por empresas, máis da metade como investigadora principal.

Na súa produción científica, é autora de 275 artigos, 30 capítulos de libros e máis de 300 comunicacións, ademais de dirixir 17 teses de doutoramento.

Foi merecedora do Premio Nacional de Fin de Carreira (Ministerio de Educación e Ciencia), e tamén do Premio Nacional ‘Jaime Ferrán’, da Sociedade Española de Microbioloxía, entre outros recoñecementos.

É membro da Real Academia Galega de Ciencias e da Academia de Farmacia de Galicia.