Yolanda Prezado Alonso (Verín, Ourense, 1977) é doutora en Física e investigadora distinguida Oportunius no Centro de Investigación en Medicina Molecular e Enfermidades Crónicas (CiMUS) da Universidade de Santiago de Compostela. Especialista en física médica, os seus avances para lograr técnicas de radioterapia menos invasivas e máis eficaces convertérona nunha referencia internacional no seu campo.

Licenciada en Física pola Universidade de Santiago de Compostela, doutorouse nesta mesma universidade en 2003. Desenvolveu a maior parte da súa carreira en Francia: en 2011 obtivo unha praza permanente de investigadora no Centro Nacional para a Investigación Científica (CNRS) e, desde 2013, dirixe o equipo «Novos Enfoques en Radioterapia». En 2019 incorporouse ao Institut Curie de París como líder de grupo en radiobioloxía traslacional, onde consolidou unha liña de investigación propia na fronteira entre a física e a bioloxía.

O seu traballo céntrase na radioterapia con minifeixes de protóns, unha técnica que permite tratamentos máis precisos e cunha menor toxicidade para os tecidos sans, con grande potencial na loita contra o cancro. Esta liña deu un paso decisivo en 2019, cando obtivo unha ERC Consolidator Grant (unha das axudas máis prestixiosas do Consello Europeo de Investigación), e viuse recoñecida en 2021 co Premio M. e Mme. Peyré da Academia Francesa de Ciencias.

Referente feminino nun ámbito fortemente masculinizado, presidiu o Comité Científico da Federación Europea de Física Médica (EFOMP), que representa máis de 8.000 profesionais en Europa, así como o Congreso Europeo de Física Médica de 2024. Ao longo da súa carreira dirixiu oito teses de doutoramento e supervisou unha ducia de investigadores e investigadoras posdoutorais, e asinou máis de douscentos artigos científicos, a maioría como autora principal.

En 2024, tras máis dunha década en Francia, retornou a Galicia da man do programa Oportunius da Axencia Galega de Innovación (GAIN), instrumento da Xunta para a captación de talento investigador de excelencia. Desde o CiMUS impulsa a investigación en protonterapia, situando a Galicia nunha posición de vangarda nun ámbito chamado a transformar o tratamento do cancro.
 

África González Fernández (Madrid, 1962) é médica inmunóloga e catedrática de Inmunoloxía da Universidade de Vigo, cofundadora da empresa Nanoinmunotech e académica da Real Academia de Farmacia de Galicia. A súa traxectoria desenvólvese na fronteira entre a inmunoloxía e a nanomedicina, dous eidos nos que está considerada unha das científicas máis prestixiosas de Europa.

Licenciada en Medicina e Cirurxía pola Universidade de Alcalá, coa que obtivo o Premio Extraordinario de fin de carreira, especializouse en Inmunoloxía na Clínica Puerta de Hierro de Madrid ao tempo que elaboraba a súa tese doutoral. Realizou despois unha estadía posdoutoral de catro anos no Laboratory of Molecular Biology de Cambridge, baixo a supervisión do premio Nobel César Milstein, onde participou na investigación da técnica de obtención de anticorpos monoclonais e levou a cabo estudos do proceso de hipermutación somática, poñendo en marcha técnicas innovadoras e o emprego de animais transxénicos.

En 1996 incorporouse á Universidade de Vigo, onde creou a primeira área de Inmunoloxía das universidades galegas, e desde 2009 é catedrática desta disciplina. Foi directora do Centro de Investigacións Biomédicas (Cinbio) da Universidade de Vigo, onde lidera un grupo de investigación centrado na resposta inmunitaria, na inmunoloxía básica e aplicada e no desenvolvemento de vacinas que axuden a erradicar enfermidades infecciosas como a tuberculose. É, ademais, coordinadora da área de enfermidades infecciosas, inflamatorias e inmunomediadas do Instituto de Investigación Sanitaria Galicia Sur e integrante das plataformas europeas de nanomedicina.

No campo da nanomedicina desenvolveu un biosensor para identificar células tumorais, estuda a interacción entre os nanomateriais e o sistema inmunitario e emprega nanovacinas para a terapia do cancro. Nesta liña cofundou en 2009 a empresa Nanoinmunotech, dedicada ao desenvolvemento de tecnoloxías a partir de nanomateriais.

Foi presidenta da Sociedade Española de Inmunoloxía (2016-2020) e finalista dos premios europeos Mulleres Innovadoras da Comisión Europea. Ao longo da súa traxectoria recibiu numerosos recoñecementos, entre eles o Premio de Igualdade Ernestina Otero e a distinción de Viguesa Distinguida. Autora de centos de artigos científicos, libros e capítulos, compaxina a investigación cunha intensa labor de divulgación, da que é boa mostra o seu libro Inmuno Power, coa que achega o coñecemento do sistema inmunitario á sociedade.