María Loureiro García é unha investigadora e economista galega, catedrática no Departamento de Fundamentos da Análise Económica da Universidade de Santiago de Compostela (USC), e directora científica do Centro de Investigación Interuniversitario en Economía e Empresa para a Sociedade (ECOBAS). Os seus campos de investigación están moi influenciados polo contorno galego onde naceu (A Pontenova), e abarcan a economía ambiental, a dos recursos naturais, e máis recentemente a economía do cambio climático.
Despois da súa licenciatura e co apoio das bolsas da Fundación Caixa Galicia, formouse na Washington State University. Unha estadía que nun principio era só para un máster, estendeuse a sete anos en EE.UU, obtendo o doutoramento nesta mesma universidade e sendo contratada como profesora na Colorado State University (EE.UU.). Despois de ampliar a súa experiencia na U. Carlos III de Madrid e no actual Instituto de Bioeconomía de Oslo, retornou a Galicia da mán do programa Ramón y Cajal.
Segundo REPEC, é unha das economistas máis citadas en España, e está incluída dentro do 2% dos científicos máis influentes a nivel mundial, segundo o ranking elaborado por Stanford. É editora da revista Ecological Economics e co-editora de Environmental & Resource Economics.
Ao longo da súa carreira, acumulou varios premios de investigación, incluíndo o premio ao Mellor Investigador Mozo en Ciencias Sociais en Galicia (Xunta de Galicia, 2006). No 2022 entrou na Real Academia das Ciencias, sendo a primeira muller na sección de economía. Tamén é membro do comité científico do Real Instituto Elcano e da Fundación Gadea.
O seu traballo ten transcendido fóra do ámbito académico. Destaca, entre outros, o seu estudo sobre os impactos ambientais e económicos ocasionados polo derrame do buque Prestige, que foi utilizado pola Fiscalía no xuízo desta catástrofe ambiental.
