O día 11 de febreiro é o Día Internacional das Mulleres e as Nenas na Ciencia e foi aprobado pola Asemblea Xeral das Nacións Unidas no ano 2015 co obxecto de lograr o acceso e a participación plena e equitativa na ciencia para as mulleres e as nenas, para lograr a igualdade de xénero e o empoderamento das mulleres e as nenas neste ámbito da tecnoloxía.
É necesario seguir visualizando o traballo das nosas científicas, fomentar a vocación investigadora das nenas e eliminar os estereotipos de xénero na ciencia e na tecnoloxía (STEM). O Día Internacional das Mulleres e as Nenas na Ciencia recordamos que as mulleres e as nenas desempeñan un papel fundamental na ciencia e na tecnoloxía e que a súa participación debe fortalecerse. Con esta idea nace este proxecto. Queremos presentar científicas de Galicia, mulleres que souberon adiantarse ao seu tempo, que abriron camiños a moitas outras e que poden ser referentes para moitas nenas.
Este proxecto consta dunha serie de entrevistas a Mulleres Galegas que foron galardoas co premio María Josefa Wonenburger Planells que outorga anualmente dende o 2007 a Xunta de Galicia a través da Unidade de Muller e Ciencia.
María Victoria Lareu Huidobro. Premio María Josefa Wonenburger Planells 2021
Licenciada en Medicina e Ciruxía pola USC (1984), continuando a súa formación en diferentes centros de investigación de especial relevancia en medicina forense como o Instituto Medicina Legal de Coímbra ou London Hospital College. Realiza a súa tese doutoral sobre marcadores xenéticos na cirrose hepática alcohólica (1990) na USC, integrándose no Departamento de Patoloxía e Ciencias Forenses como profesora asistente e realizando a súa actividade investigadora e docente centrada no campo da xenética forense, participando na introdución no campo dos loci STR.
Amparo Alonso Betanzos. Premio María Josefa Wonenburger Planells 2020
Licenciada en Química coa especialidade de Química Industrial (1984) e doutorouse en Física (1988) na Universidade de Santiago de Compostela, onde por primeira vez dirixiu o foco do seu traballo á área da informática biomédica. Completou a súa formación posdoutoral no Medical College de Georgia (EEUU), traballando no desenvolvemento de Sistemas Expertos para aplicacións médicas. Posteriormente centrou o seu labor científico nas aplicacións da Intelixencia Artificial en ámbitos tan distintos como o medio ambiente, a saúde e a industria 4.0, así como nos avances en algoritmos de aprendizaxe automática.
Mabel Loza García. Premio María Josefa Wonenburger Planells 2019
É licenciada en Farmacia pola USC, realizou a súa tese doutoral na Facultade de Medicina de Oviedo e completou a súa formación científica no Centro Médico Monte Sinaí de Nova York. Na actualidade é Catedrática de Farmacoloxía da USC, onde compaxina o labor docente e investigador. Dirixe o grupo de investigación BioFarma centrado na aplicación da farmacoloxía ao descubrimento de fármacos.
Alicia Estévez Toranzo. Premio María Josefa Wonenburger Planells 2018
Doutora en Bioloxía e licenciada en Farmacia pola Universidade de Santiago de Compostela (USC). Desenvolveu parte da súa formación postdoutoral nas universidades de Maryland e Oregón. É catedrática do Departamento de Microbioloxía e Parasitoloxía da USC. Codirixe o grupo de investigación en Patoloxía de Animais Acuáticos, Grupo de Referencia Competitiva da Xunta de Galicia. É membro da Real Academia Galega de Ciencias e da Academia de Farmacia de Galicia.
Begoña Vila Costas. Premio María Josefa Wonenburger Planells 2017
Licenciada en Física pola Universidade de Santiago de Compostela (USC), coa especialidade de Astrofísica pola Universidade de La Laguna (Tenerife).
Doutora en Astrofísica (1990) pola Universidade de Manchester (departamento de Radioastronomía de Jodrell Bank), completou a súa carreira posdoutoral no departamento de Física da Universidade de Cardiff.
En 2013 comezou a traballar directamente para a NASA, sendo enxeñeira principal de Sistemas no Centro Espacial Goddard, encargada de dous dos instrumentos do telescopio espacial James Webb.
Peregrina Quintela Estévez. Premio María Josefa Wonenburger Planells 2016
Peregrina Quintela Estévez (Vigo, 1960) ten dedicado un importante esforzo á transferencia do coñecemento matemático á sociedade, especialmente á súa aplicación na industria e na empresa. Licenciada en Matemáticas pola Universidade de Santiago de Compostela (USC), con dous doutoramentos, na actualidade é catedrática do Departamento de Matemática Aplicada da USC.
A súa investigación en modelización matemática tense centrado especialmente en cuestións da termo-mecánica. Neste campo, participou en preto dun cento de proxectos competitivos de investigación ou contratos de transferencia coa industria de distintos sectores e con diferentes aplicacións prácticas, e liderou máis de corenta deles.
