Con esta exposición preténdese visualizar e facer chegar á sociedade as contribucións feitas polas mulleres galegas á ciencia e á tecnoloxía. Pretende dar a coñecer ó alumnado e a sociedade en xeral, a mulleres galegas científicas e galardoadas co Premio María Josefa Wonenburger Planells, que outorga anualmente dende o ano 2007 a Xunta de Galicia a través da Unidade de Muller e Ciencia.
O Premio leva o nome da investigadora e matemática galega María Josefa Wonenburger Planells, unha auténtia pioneira e referente feminino internacional no ámbito das ciencias e que foi unha científica adiantada ao seu tempo. Dende a creación do Premio foron merecedoras deste recoñecemento mulleres que dedican a súa vida profesional a algún campo específico da ciencia ou da tecnoloxía e coa visibilización, a través desta exposición da súa actividade e do seu triunfo, podemos lograr afianzar a idea de que muller e ciencia non só son compatibles senón que son unha combinación gañadora.
Aínda queda un camiño que percorrer ata a completar a paridade, non só no ámbito da investigación, senón en todos os ámbitos dunha sociedade globalizada e tecnolóxica como é a nosa, pero o Goberno galego quere ser actor significativo nese camiño e presenta esta exposición das mulleres galardoadas ao longo dos anos polas súas brillantes achegas á nosa sociedade.
Na actualidade a Secretaría Xeral da Igualdade conta con catro exposicións das premiadas María Josefa Woneneburger Planells que se prestan aos centros educativos galegos e a outras entidades interesadas en facer chegar á sociedade as contribucións feitas polas mulleres galegas á ciencia e á tecnoloxía. Con esta iniciativa preténdese achegar ao alumado dos centros educativos e á sociedade en xeral os logros das mulleres científicas galegas merecedoras deste premio.
Unha das exposicións dos Premios María Josefa Wonenburger Panells préstase de xeito itinerante aos centros educativos participantes no programa “Donas de Si”, que xestiona a Secretaría Xeral da Igualdade coa colaboración da Secretaría Xeral de Educación e Formación Profesional e que está incluido no Plan Proxecta da Xunta de Galicia.
O programa Donas de Si ten como obxectivo contribuir á visibilización e empoderamento das mulleres como pezas fundamentais do desenvolvemento da sociedade galega e como punto de partida para traballar na aula a igualdade e os estereotipos de xénero. No curso 2021-2022 están participando neste programa 65 centros educativos, 35 de infantil e primaria e 30 de secundaria.
Logo do camiño na loita pola igualdade de dereitos entre os homes e as mulleres na sociedade do século XIX, cómpre afondar neste empeño, recoñecendo os valores e as achegas das mulleres á innovación cultural, científica e intelectual e situalas nos contextos que lles tocou vivir. Para esta tarefa é esencial descubrir aspectos esquecidos e que nos axuden a comprender máis profundamente o que significaron. De aí a importancia da difusión dos logros destas mulleres.
Durante a celebración do Acto de entrega dos Premios Maria Josefa Wonenburger 2021, a Exposición estivo instalada no Pazo de Congresos, en Santiago de Compostela.
