Contacontos e libros sobre mulleres senlleiras: Ángeles Alvariño, Maruxa Mallo, Mª Vitoria Moreno, Ernestina Otero e Ángela Ruiz Robles.

Esta actividade está enmarcada dentro dos centros de ensino que participan no programa DONAS DE SI, do Plan Proxecta da Consellería de Cultura, Educación, Formación Profesional e Universidades. O programa "Donas de si" da Secretaría Xeral da Igualdade ten como obxectivo principal  a visibilización e posta en valor da participación e produción das mulleres como pezas fundamentais na configuración e no desenvolvemento da sociedade galega contemporánea, de xeito que se recoñeza o seu papel político, social, artístico, científico e cultural e se supere a visión tradicional que presenta as súas achegas como puramente anecdóticas ou secundarias. Este é o punto de partida para traballar na aula a igualdade e os estereotipos de xénero. Dende a Secretaria Xeral da Igualdade consideramos necesaria unha aproximación de conxunto -que teña en conta a variable de xénero- a figuras relevantes da nosa historia (atendendo especialmente as figuras esquecidas ou ocultas) para construír e divulgar a memoria histórica feminina de Galicia.

Entre as publicacións que a Secretaría Xeral da Igualdade remite aos centros educativos participantes no programa Donas de Si figuran os libros da colección Mulleres Galegas composta por cinco biografías de mulleres: Ángeles Alvariño, Maruja Mallo, María Victoria Moreno, Ernestina Otero e Ángeles Ruiz Robles. Son libros de pequeno formato coa biografía da autora e con actividades ao final, axeitados para o alumnado de infantil e primaria.

Sobre algún deses cinco títulos de Mulleres galegas, a Secretaría Xeral da Igualdade oferta aos centros educativos de infantil e primaria participantes unha actuación dun contacontos ilustrado, baseado na biografía dalgunha das mulleres da colección. Persoal da empresa que editou os contos desprazarase ata o centro para desenvolver a actividade, na que participan ata 50 nenos e nenas.

Durante o curso 2021-2022 foron 35 os centros de ensino de infantil e primaria que participaron nesta actividade de contacontos pola igualdade, na que a protagonista foi unha destas cinco mulleres, elixida polo centro:

• Ángeles Alvariño, un Ronsel de Ardora
• Maruja Mallo, meiga nova, metade anxo metade marisco
• María Victoria Moreno, unha historia de amor
• Ernestina Otero, semente de igualdade, semente de liberdade
• Ángeles Ruiz Robles, o valor das ideas, a precursora do libro electrónico.